ஹல்துமுல்லை, சோரகுணே தபால் அலுவலகத்துடன் இணைந்து பணியாற்றும் தபால் ஊழியர் ஒருவரின் வீட்டிலிருந்து, நீண்டகாலமாக விநியோகிக்கப்படாமல் வைக்கப்பட்டிருந்த 2,080 தபால் கடிதங்கள் மீட்கப்பட்டுள்ளதாகத் தெரிவிக்கப்படுகிறது.
ஹல்துமுல்லை பொலிஸ் நிலையப் பொறுப்பதிகாரிக்குக் கிடைத்த தகவலின் அடிப்படையில், குறித்த தபால் ஊழியரின் வீட்டில் பொலிஸார் சோதனை மேற்கொண்டுள்ளனர்.
இதன்போது, 2,065 சாதாரண கடிதங்களும் 15 பதிவுத் தபால் கடிதங்களும் கண்டுபிடிக்கப்பட்டுள்ளன. இக்கடிதங்கள் 2021ஆம் ஆண்டு முதல் விநியோகிக்கப்படாமல் இருந்ததாகத் தெரிவிக்கப்படுகிறது.
மீட்கப்பட்ட கடிதங்களில் அரசாங்க அலுவலகங்கள், வங்கிகள் மற்றும் நீதிமன்றங்களிலிருந்து அனுப்பப்பட்ட கடிதங்கள், நேர்முகத் தேர்வுகளுக்கான அழைப்புக் கடிதங்கள் உள்ளிட்ட முக்கிய ஆவணங்கள் உள்ளடங்குவதாகக் கூறப்படுகிறது.
குறித்த தபால் ஊழியர் கடமையில் ஈடுபடும் போது சட்டவிரோத மதுபானமான கசிப்பு அருந்துவதாகக் கிடைத்த தகவலின் அடிப்படையிலேயே வீட்டில் சோதனை நடத்தப்பட்டதாகவும் தெரிவிக்கப்படுகிறது.
சம்பவம் தொடர்பில் கைது செய்யப்பட்டதாகத் தெரிவிக்கப்படும் குறித்த ஊழியர், பண்டாரவளை நீதவான் நீதிமன்றத்தில் ஆஜர்படுத்தப்பட உள்ளதாகத் தகவல்கள் தெரிவிக்கின்றன.
மேலதிக விசாரணைகளை ஹல்துமுல்லை பொலிஸார் முன்னெடுத்து வருகின்றனர்.
