பாம்பன் கடற்பகுதியில் மீனவர்களின் வலையில் சிக்கிய ஏழு அரிய வகை கூரல் மீன்கள், இந்திய மதிப்பில் 3 இலட்சத்து 67 ஆயிரம் ரூபாய்க்கு ஏலத்தில் விற்பனை செய்யப்பட்டுள்ளன.
இதனால் பாம்பன் விசைப்படகு மீனவர்கள் மகிழ்ச்சியடைந்துள்ளனர்.
தமிழ்நாட்டின் இராமநாதபுரம் மாவட்டம் பாம்பன் பகுதியில், மன்னார் வளைகுடா கடற்பரப்பில் இருந்து நேற்று 20ஆம் திகதி, 90க்கும் மேற்பட்ட விசைப்படகுகளில் மீனவர்கள் மீன்பிடிக்கச் சென்றுள்ளனர்.
இந்நிலையில் வடகிழக்குப் பருவமழை காரணமாக தென் கடற்பகுதிகளில் கனமழை பெய்து வந்த நிலையில், மீன்பிடித்துவிட்டுத் இன்று 21ஆம் திகதி மீனவர்கள் கரை திரும்பியுள்ளனர்.
இதன்போது, தங்கச்சிமடத்தைச் சேர்ந்த டிட்டோ என்பவருக்குச் சொந்தமான விசைப்படகில் ஐந்து கூரல் மீன்களும், மற்றொரு விசைப்படகில் இரண்டு கூரல் மீன்களும் சிக்கியுள்ளன.
மொத்தமாக ஏழு மீன்களும் 105 கிலோகிராம் எடை கொண்டிருந்த நிலையில், ஒரு கிலோகிராம் 3 ஆயிரத்து 500 ரூபாய் வீதம், மொத்தம் 3 இலட்சத்து 67 ஆயிரத்து 500 ரூபாய்க்கு ஏலத்தில் விற்பனை செய்யப்பட்டுள்ளன.
இந்தக் கூரல் மீன்கள் பொதுவாக உணவுக்காகப் பயன்படுத்தப்படுவதில்லை. மாறாக, அவற்றின் வயிற்றுப் பகுதியில் காணப்படும் காற்றுப்பை போன்ற அமைப்பான Fish Maw அதிக வணிக மதிப்பைக் கொண்டுள்ளது.
இந்தப் பொருள் சில உணவுப் பொருட்கள் மற்றும் தொழில்துறைப் பயன்பாடுகளுக்குப் பயன்படுத்தப்படுவதுடன், கிழக்காசிய நாடுகளில் விலையுயர்ந்த சூப் தயாரிப்பதற்கும் பயன்படுத்தப்படுவதாக மீனவர்கள் தெரிவிக்கின்றனர்.
இந்நிலையில், ஒரே நாளில் பிடிக்கப்பட்ட ஏழு கூரல் மீன்களும் பல இலட்சம் ரூபாய்க்கு விற்பனையானமை, பாம்பன் விசைப்படகு மீனவர்களிடையே மகிழ்ச்சியை ஏற்படுத்தியுள்ளது.
