யாழில் மின் கம்பத்துடன் மோட்டார்சைக்கிள் மோதி இருவர் பலி!

யாழ்ப்பாணத்தில் ஞாயிற்றுக்கிழமை (01.11.2026) இடம்பெற்ற மோட்டார் சைக்கிள் விபத்தொன்றில் இரு இளைஞர்கள் பரிதாபமாக உயிரிழந்துள்ளனர்.

சுன்னாகம் பகுதியைச் சேர்ந்த 17 வயது மற்றும் 24 வயதுடைய இரு இளைஞர்களே இவ்வாறு உயிரிழந்தவர்களாவர்.

குறித்த இரு இளைஞர்களும் மோட்டார் சைக்கிளொன்றில் அதிவேகமாக வீதியில் பயணித்த வேளையில், அளவெட்டி அழுக்கை சந்திப் பகுதியில் வைத்து மோட்டார் சைக்கிள் கட்டுப்பாட்டை இழந்துள்ளது.

இதன்போது, வீதியோரத்தில் இருந்த மின் கம்பத்துடன் மோட்டார் சைக்கிள் மோதி விபத்துக்குள்ளானதில், அதில் பயணித்த இரு இளைஞர்களும் சம்பவ இடத்திலேயே உயிரிழந்துள்ளனர்.

இவ்விபத்தினைத் தொடர்ந்து, உயிரிழந்த இரு இளைஞர்களின் சடலங்களையும் மீட்ட தெல்லிப்பழை பொலிஸார், அவற்றை தெல்லிப்பழை வைத்தியசாலைக்கு அனுப்பி வைத்துள்ளனர்.

சம்பவம் தொடர்பில் தெல்லிப்பழை பொலிஸார் மேலதிக விசாரணைகளை முன்னெடுத்து வருகின்றனர்.