யாழ்ப்பாணத்திற்கு விஜயம் மேற்கொண்ட பாதுகாப்புச் செயலாளர் எயார் வைஸ் மார்ஷல் சம்பத் தூயகொந்தா (ஓய்வு), பொதுமக்களின் எதிர்ப்புக்கு மத்தியில் சர்ச்சைக்குரிய வசாவிளான் இராணுவ வைத்தியசாலையை நேரில் பார்வையிட்டுள்ளார்.
யாழ்ப்பாணம் வருகை தந்த பாதுகாப்புச் செயலாளர், முதலில் பலாலியில் அமைந்துள்ள யாழ்ப்பாணப் பாதுகாப்புப் படைத் தலைமையகத்தில் இராணுவத் தளபதி லெப்டினன் ஜெனரல் நிலந்த பிரேமரத்ன உள்ளிட்ட சிரேஷ்ட இராணுவ அதிகாரிகளுடன் கலந்துரையாடியுள்ளார்.
இதன்போது வடக்கு மாகாணத்தில் இராணுவத்தின் செயற்பாடுகள், நிர்வாக விடயங்கள், மூலோபாயத் தேவைகள், வழங்கல் ஏற்பாடுகள் மற்றும் படையினரின் நலன்புரி விடயங்கள் தொடர்பில் ஆராயப்பட்டுள்ளன.
இதனைத் தொடர்ந்து வசாவிளான் பகுதியில் அமைக்கப்பட்டு வரும் இராணுவ வைத்தியசாலைக்குச் சென்ற பாதுகாப்புச் செயலாளர், அதன் கட்டடத் தொகுதியைப் பார்வையிட்டதுடன் அபிவிருத்திப் பணிகள் குறித்தும் ஆராய்ந்துள்ளார்.
எனினும், குறித்த வைத்தியசாலை அமைந்துள்ள பகுதி உட்பட வசாவிளானில் இராணுவக் கட்டுப்பாட்டில் உள்ள பொதுமக்களின் காணிகளை விடுவிக்குமாறு அப்பகுதி மக்கள் தொடர்ந்து போராட்டங்களில் ஈடுபட்டு வருகின்றனர்.
கடந்த 36 ஆண்டுகளுக்கும் மேலாகத் தமது காணிகள் இராணுவக் கட்டுப்பாட்டில் உள்ளதாகத் தெரிவிக்கும் மக்கள், ஒவ்வொரு ஞாயிற்றுக்கிழமையும் வசாவிளான் சந்தியில் கவனயீர்ப்புப் போராட்டத்தை முன்னெடுத்து வருகின்றனர்.
மேலும், வைத்தியசாலை அமைப்பதற்கு வலிகாமம் வடக்கு பிரதேச சபையிடம் அனுமதி பெறப்படவில்லை எனக் குறிப்பிட்டு, கட்டுமானப் பணிகளை நிறுத்துமாறு பிரதேச சபையினரும் யாழ்ப்பாண மாவட்ட கட்டளைத் தளபதிக்கு எழுத்துமூலம் அறிவித்துள்ளதாகத் தெரிவிக்கப்படுகிறது.
இந்நிலையில், பாதுகாப்புச் செயலாளரின் யாழ்ப்பாண விஜயத்தின்போது பொதுமக்களின் காணி விடுவிப்பு தொடர்பான அறிவிப்பு வெளியாகும் என எதிர்பார்த்திருந்த காணி உரிமையாளர்களுக்கு, அவ்வாறான அறிவிப்பு எதுவும் வெளியிடப்படாதது ஏமாற்றத்தை ஏற்படுத்தியுள்ளது.











