இலங்கையில் இந்த ஆண்டில் இதுவரை பதிவான டெங்கு நோயாளர்களின் எண்ணிக்கை 91 ஆயிரத்தை கடந்துள்ளதாக தேசிய டெங்கு கட்டுப்பாட்டுப் பிரிவு தெரிவித்துள்ளது.
நேற்று (13) வரையிலான தரவுகளின்படி, இலங்கையில் பதிவான மொத்த டெங்கு நோயாளர்களின் எண்ணிக்கை 91,346 ஆக உயர்ந்துள்ளது. டெங்கு நோய் காரணமாக இதுவரை 68 மரணங்கள் பதிவாகியுள்ளதாகவும் தேசிய டெங்கு கட்டுப்பாட்டுப் பிரிவு தெரிவித்துள்ளது.
இந்த ஆண்டில் அதிகளவிலான டெங்கு நோயாளர்கள் கடந்த ஜூலை மாதத்திலேயே பதிவாகியுள்ளனர். ஜூலை மாதத்தில் மட்டும் 29,968 பேர் டெங்கு நோயால் பாதிக்கப்பட்டுள்ளனர்.
இதனிடையே, இம்மாதத்தின் முதல் 13 நாட்களில் 6,004 புதிய டெங்கு நோயாளர்கள் பதிவாகியுள்ளதாக தேசிய டெங்கு கட்டுப்பாட்டுப் பிரிவு குறிப்பிட்டுள்ளது.
மாகாண வாரியான பதிவுகளில், மேல் மாகாணத்தில் அதிகபட்சமாக 48,383 டெங்கு நோயாளர்கள் பதிவாகியுள்ளனர். அதனைத் தொடர்ந்து, தென் மாகாணத்தில் 13,479 பேரும், மத்திய மாகாணத்தில் 8,160 பேரும் டெங்கு நோயால் பாதிக்கப்பட்டுள்ளதாக தெரிவிக்கப்பட்டுள்ளது.
டெங்கு பரவல் தொடர்ந்து அதிகரித்து வரும் நிலையில், கொசு பெருகக்கூடிய இடங்களை அகற்றுதல் மற்றும் சுற்றுப்புறங்களை சுத்தமாக வைத்திருத்தல் உள்ளிட்ட தடுப்பு நடவடிக்கைகளை பொதுமக்கள் தீவிரமாக மேற்கொள்ள வேண்டும் என சுகாதாரத் தரப்பினர் வலியுறுத்துகின்றனர்.
