காங்கிரஸ் கட்சியின் இளைஞர் தொடர்பு திட்டமான ‘சத்ரோன் கி கூஞ்ச்’ (மாணவர்களின் குரல்) நிகழ்வின் ஒரு பகுதியாக, அக்கட்சியின் மூத்த தலைவரும் மக்களவை எதிர்க்கட்சித் தலைவருமான ராகுல் காந்தி அக்டோபர் 10 ஆம் திகதி தமிழக மாணவர்களுடன் கலந்துரையாடவுள்ளார் என தமிழ்நாடு காங்கிரஸ் கமிட்டி தலைவர் பி. மாணிக்கம் தாகூர் தெரிவித்துள்ளார்.
சென்னை தீவுத்திடலில் (Island Grounds) அக்டோபர் 10 ஆம் திகதி மாலை 4.30 மணிக்கு இக்கலந்துரையாடல் நிகழ்வு ஆரம்பமாகவுள்ளது.
‘சத்ரோன் கி கூஞ்ச்’ திட்டத்தின் ஆறாவது பதிப்பாக இந்நிகழ்வு அமையவுள்ளதுடன், இதன் முதல் ஐந்து பதிப்புகள் கோட்டா, டேராடூன், பிரயாக்ராஜ், புனே மற்றும் இந்தூர் ஆகிய இடங்களில் நடைபெற்று முடிந்துள்ளன.
மத்தியில் பா.ஜ.க. ஆட்சிக்கு வந்ததில் இருந்து வினாத்தாள் கசிவு மற்றும் பயிற்சி மையங்கள் மூலம் கட்டணம் என்ற பெயரில் நடைபெறும் முறைகேடுகள் போன்ற பல சிக்கல்களை மாணவர்கள் எதிர்கொண்டு வருவதாக மாணிக்கம் தாகூர் குற்றம் சாட்டியுள்ளார்.
அத்துடன், நீட் தேர்வு எதிர்ப்பு மற்றும் வினாத்தாள் கசிவு போன்ற விடயங்களில் மாணவர்கள் தங்கள் உரிமைகளுக்காகப் போராடும் மாநிலமாகத் தமிழ்நாடு விளங்குவதாகவும் அவர் குறிப்பிட்டுள்ளார்.
இவ்வாறான சூழலில், ‘பாரத் ஜோடோ யாத்ரா’ போன்ற முன்னெடுப்புகளைத் தொடர்ந்து ராகுல் காந்தி தனது போராட்டத்தை முன்னெடுத்து வருவதாகவும், வரவிருக்கும் இந்நிகழ்ச்சியில் தமிழக மாணவர்கள் ராகுல் காந்தியிடம் தங்கள் கருத்துகளையும் கவலைகளையும் பகிர்ந்துகொள்ளுமாறும், கேள்விகளை எழுப்புமாறும் அவர் அழைப்பு விடுத்துள்ளார்.
முன்னதாக, செப்டம்பர் 19 அன்று இந்தூரில் நடைபெற்ற நிகழ்வில் உரையாற்றிய ராகுல் காந்தி, கல்வித் துறை உள்ளிட்ட நாட்டின் ஒட்டுமொத்த அமைப்பும் சீரழிந்துள்ளதாகவும், அது மாணவர்கள் கேள்விகள் கேட்பதை விரும்புவதில்லை என்றும் தெரிவித்திருந்தமை குறிப்பிடத்தக்கது.
