பெரும் முதலாளிகள் கடலட்டை வளர்ப்பு தொழிலில் ஈடுபடுவதால் சிறு மீனவர்கள் பெரிதும் பாதிக்கப்படுவதாக வடக்கு மாகாண மீனவ பிரதிநிதி நா. வர்ணகுலசிங்கம் தெரிவித்துள்ளார்.
தனது இல்லத்தில் இன்று பிற்பகல் இடம்பெற்ற ஊடகவியலாளர் சந்திப்பிலேயே அவர் இதனைத் தெரிவித்துள்ளார்.
வடக்கு மீனவர் பிரதிநிதிகள், உள்ளூர் இழுவைமடி படகுகளால் கடல் வளங்கள் அழிக்கப்படுகின்றமை, கடலட்டை வளர்ப்பினால் சிறு மீனவர்கள் எதிர்நோக்கும் பாதிப்புகள் உள்ளிட்ட பல்வேறு பிரச்சினைகள் தொடர்பாக மீன்பிடி அமைச்சின் பணிப்பாளர் நாயகத்திடம் முறையிட்டதாக அவர் கூறினார்.
கடல் வளங்களை பாதுகாப்பது தொடர்பாக தாம் கலந்துரையாடியபோது, உள்ளூர் இழுவைமடி படகுகள் இறால் பிடித் தொழிலில் ஈடுபடுவதாக பணிப்பாளர் நாயகம் தெரிவித்ததாகவும் அவர் குறிப்பிட்டார்.
மேலும், தென்பகுதியில் வத்தளை குண்டு பகுதியில் உள்ளூர் இழுவைமடி படகுத் தொழில் தடை செய்யப்பட்ட பின்னர், குறைந்தளவு மண்ணெண்ணெய் செலவில் அதிக வருமானம் ஈட்டப்படுவதாகவும் அவர் தெரிவித்தார். இதேபோன்று வடக்கிலும் உள்ளூர் இழுவைமடி படகுத் தொழிலுக்கு உரிய முறையில் தடை விதிக்க வேண்டும் எனவும் கோரிக்கை விடுத்தார்.
மணல்காடு முதல் முல்லைத்தீவு நாயாறு வரையான கடற்பகுதிகளில் வலைகளைப் பயன்படுத்தியே இறால் பிடித் தொழில் மேற்கொள்ளப்படுவதாகவும் அவர் கூறினார்.
அத்துடன், பல ஏக்கர் பரப்பளவில் அமைக்கப்படும் கடலட்டை வளர்ப்பு பண்ணைகளில் ஐயர்கள், மருத்துவர்கள், பொறியியலாளர்கள் உள்ளிட்ட பெரும் முதலாளிகள் ஈடுபட்டு வருவதாகவும், இதனால் மீன் பெருக்கிடங்கள் அழிக்கப்பட்டு சிறு மீனவர்களின் வாழ்வாதாரம் பாதிக்கப்படுவதாகவும் அவர் குற்றம் சாட்டினார்.
இதேவேளை, கடலில் இடம்பெறும் உள்ளூர் இழுவைமடி படகுத் தொழிலினாலும் மீன் பெருக்கிடங்கள் அழிக்கப்படுவதாக அவர் தெரிவித்தார்.
இந்த விடயங்கள் தொடர்பாக கொழும்பில் உயர்மட்ட சந்திப்பொன்றை நடத்தி நடவடிக்கை எடுக்க உள்ளதாகவும், மண்ணெண்ணெய் மானியம் வழங்கும் முறையில் பல மீனவர்கள் பாதிக்கப்பட்டுள்ளதாகவும், அது தொடர்பிலும் நடவடிக்கை எடுக்குமாறு மீன்பிடி அமைச்சின் பணிப்பாளர் நாயகத்திடம் கோரிக்கை விடுத்ததாகவும் நா. வர்ணகுலசிங்கம் தெரிவித்தார்.
