தமிழக அரசின் மகளிர் இலவச பேருந்து பயண திட்டத்தை எதிர்த்து தனியார் பேருந்து உரிமையாளர்கள் சென்னை உயர்நீதிமன்றத்தில் மனு தாக்கல் செய்துள்ளனர்.
தமிழக அரசு, அரசு நகரப் பேருந்துகளில் மகளிருக்கு இலவச பயண திட்டத்தை அமுல்படுத்தி செயல்படுத்தி வருகிறது.
இந்த திட்டத்தின் மூலம் அரசுப் பேருந்துகளில் அதிகளவிலான பெண்கள் பயணம் செய்து வருகின்றனர்.
இந்நிலையில், இந்த இலவச பயண திட்டத்தால் தங்களுக்குப் பெரும் நிதி இழப்பு ஏற்படுவதாகத் தெரிவித்து, தனியார் பேருந்து உரிமையாளர்கள் சங்கம் சார்பில் சென்னை உயர்நீதிமன்றத்தில் வழக்குத் தொடரப்பட்டுள்ளது.
அவர்கள் தாக்கல் செய்துள்ள மனுவில், அரசுப் பேருந்துகளில் மகளிருக்கு இலவச பயணம் வழங்கப்படுவதால் தனியார் பேருந்துகளில் பயணிக்கும் பயணிகளின் எண்ணிக்கை கணிசமாகக் குறைந்துள்ளதாகவும், இதனால் தங்களுக்குத் தொடர்ச்சியாகப் பொருளாதார ரீதியில் இழப்பு ஏற்படுவதாகவும் குறிப்பிட்டுள்ளனர்.
மேலும், தனியார் பேருந்துகளிலும் மகளிர் இலவசமாகப் பயணம் செய்வதற்கான தொகையை அரசு வழங்க வேண்டும் அல்லது இந்த திட்டத்தால் தங்களுக்கு ஏற்படும் நிதி இழப்பீட்டை ஈடுசெய்ய உரிய நடவடிக்கை எடுக்க வேண்டும் என அந்த மனுவில் வலியுறுத்தப்பட்டுள்ளது.
இந்த வழக்கு விரைவில் உயர்நீதிமன்றத்தில் விசாரணைக்கு வரும் என எதிர்பார்க்கப்படுகிறது.
