கியூபெக் மாகாணம், லோங்குயே (Longueuil) நகரில் பாலியல் வன்கொடுமை மற்றும் சிறுவர்கள் மீதான பாலியல் துஷ்பிரயோகக்
குற்றச்சாட்டுகளின் கீழ் கைது செய்யப்பட்டுள்ள சந்தேகநபருக்கு எதிராக மேலும் பல பாதிக்கப்பட்டவர்கள் இருக்கக்கூடும் எனப் பொலிஸார் சந்தேகம் வெளியிட்டுள்ளனர்.
பாதிக்கப்பட்ட ஏனைய நபர்களையும் தகவல்களை அறிந்தவர்களையும் உடனடியாகத் தொடர்பு கொள்ளுமாறு லோங்குயே பொலிஸ் திணைக்களம் பகிரங்கக் கோரிக்கை விடுத்துள்ளது.
கைது செய்யப்பட்டுள்ள சந்தேகநபர் தொடர்பான விரிவான விசாரணைகளை முன்னெடுத்து வரும் பொலிஸார், அவரிடமிருந்து
பாதிக்கப்பட்ட மேலதிக நபர்களை அடையாளம் காணும் நடவடிக்கைகளில் தீவிரமாக ஈடுபட்டுள்ளனர்.
சந்தேகநபர் சமூக வலைத்தளங்கள் மூலமாகவும், பொது இடங்கள் வாயிலாகவும் தனக்குத் தேவையான நபர்களைத் தொடர்பு கொண்டு,
அவர்களைப் பாலியல் துஷ்பிரயோகத்திற்கு உட்படுத்தியிருக்கலாம் எனப் பொலிஸாரின் முதற்கட்ட விசாரணைகளில் தெரியவந்துள்ளது.
பாதிக்கப்பட்டவர்களில் பெரும்பாலோர் சிறுவர்கள் மற்றும் இளம் பெண்கள் என சந்தேகிக்கப்படும் நிலையில், இது தொடர்பில் லோங்குயே பொலிஸார் தீவிர கண்காணிப்பை மேற்கொண்டு வருகின்றனர்.
சந்தேகநபரின் குற்றப் பின்னணி மற்றும் அவர் கையாண்ட முறைகளைக் கருத்தில் கொண்டு பார்க்கும்போது, இன்னும் பல பாதிக்கப்பட்ட நபர்கள் வெளியில் வர தயங்கிக்கொண்டிருக்கலாம் என தாம் நம்புவதாக, காவல்துறையினர் தெரிவித்துள்ளனர்.
பாதிக்கப்பட்டவர்கள் அல்லது இது குறித்த தகவல்களை அறிந்த பொதுமக்கள், லோங்குயே பொலிஸாரின் பிரத்யேக தொலைபேசி
இலக்கத்தை இரகசியமான முறையில் தொடர்பு கொண்டு தகவல்களை வழங்க முடியும் என அறிவிக்கப்பட்டுள்ளது.
மொண்ட்ரியால் தெற்குப் பகுதியில் அமைந்துள்ள லோங்குயே பகுதியில், கடந்த சில காலமாக இணையவழியிலும் நேரடித் தொடர்புகள் மூலமாகவும் இடம்பெறும் பாலியல் குற்றச் செயல்களைத் தடுப்பதற்குப் பொலிஸார் தீவிர நடவடிக்கைகளை மேற்கொண்டு வருகின்றமை குறிப்பிடத்தக்கது.
