ஐக்கிய நாடுகள் பொதுச்சபைக் கூட்டத்தொடரில் ஆற்றவுள்ள உரையின் போது, நியூயோர்க் மேயர் ஜோஹ்ரான் மம்தானியை இஸ்ரேலிய பிரதமர் பெஞ்சமின் நெதன்யாகு கடுமையாக விமர்சிப்பார் என எதிர்பார்க்கப்படுகிறது.
தம்மைப் போர்க் குற்றவாளி எனக் குறிப்பிட்ட நியூயோர்க் மேயருக்குப் பதிலடி கொடுக்கும் வகையில் இந்த உரை அமையும் எனத் தெரிவிக்கப்படுகிறது.
இஸ்ரேலில் பொதுத்தேர்தல் நடைபெற இன்னும் சில வாரங்களே உள்ள நிலையில், நெதன்யாகு சர்வதேச ரீதியில் எதிர்கொண்டுள்ள தனிமைப்படுத்தலையே இந்த விவகாரம் வெளிப்படுத்துவதாக அரசியல் அவதானிகள் சுட்டிக்காட்டுகின்றனர்.
இந்த வாரம் வெளியிட்ட காணொளிச் செய்தி ஒன்றில் கருத்துத் தெரிவித்திருந்த நெதன்யாகு, தாம் நியூயோர்க் நகருக்குச் செல்வது இஸ்ரேலிய இராணுவத்தினரின் உண்மை நிலையை எடுத்துக் கூறுவதற்கும், மேயர் மம்தானி பற்றிய உண்மைகளை வெளிப்படுத்துவதற்குமே எனக் குறிப்பிட்டிருந்தார்.
அத்துடன், மம்தானி ஹமாஸ் அமைப்பிற்கு ஆதரவளிப்பதாகவும் நெதன்யாகு குற்றம்சாட்டியிருந்தார்.
எனினும், இந்தக் குற்றச்சாட்டை மேயர் மம்தானி நிராகரித்துள்ளார்.
முன்னதாக, நெதன்யாகு நியூயோர்க் நகருக்கு வருகை தந்தால் போர்க் குற்றச்சாட்டுகளுக்காக அவரைக் கைது செய்ய நடவடிக்கை எடுப்பதாகத் தெரிவித்துத் தேர்தல் பிரச்சாரத்தில் ஈடுபட்ட மம்தானி, பின்னர் அதற்கான சட்டப்பூர்வ அதிகாரம் தமக்கு இல்லை எனத் தெளிவுபடுத்தியிருந்தார்.
இருப்பினும், பாலஸ்தீன மக்களுக்கு எதிரான இனப்படுகொலையின் முக்கிய சூத்திரதாரி நெதன்யாகு என அவர் இந்த வாரமும் சாடியிருந்தார்.
அடுத்த மாதம் இஸ்ரேலில் பொதுத்தேர்தல் நடைபெறவுள்ள நிலையில், நெதன்யாகுவின் இந்த ஐ.நா உரை ஒரு தேர்தல் பிரச்சார உரையைப் போன்றே அமையும் என இஸ்ரேலிய முன்னாள் தூதுவர் மைக்கேல் ஓரென் தெரிவித்துள்ளார்.
உள்நாட்டு வாக்காளர்களைக் கவரும் நோக்கிலேயே அவர் மம்தானி மீதும் ஈரான் மீதும் தாக்குதல் தொடுக்கவுள்ளதாகவும் அவர் குறிப்பிட்டுள்ளார்.
இதேவேளை, ஐ.நா கூட்டத்தொடரில் பங்கேற்பதற்காக அமெரிக்கா சென்றுள்ள நெதன்யாகு, அமெரிக்க அதிபர் டொனால்ட் ட்ரம்பைச் சந்திக்கும் திட்டங்கள் எதுவும் இதுவரை அறிவிக்கப்படவில்லை.
அர்ஜென்டீனா, பொலிவியா, பனாமா மற்றும் எதியோப்பியா உள்ளிட்ட நாடுகளின் தலைவர்களை மட்டுமே அவர் சந்திக்கவுள்ளதாக பிரதமரின் அலுவலகம் அறிவித்துள்ளது.
இஸ்ரேலின் போர் நடவடிக்கைகளுக்கு சர்வதேச ரீதியில் எதிர்ப்புகள் வலுத்து வரும் நிலையிலும், உள்நாட்டில் கடும் அரசியல் அழுத்தங்களுக்கு மத்தியிலும் நெதன்யாகுவின் இந்த ஐ.நா உரை முக்கியத்துவம் பெறுகிறது.
