சூடானின் எல்லைப் புற மாநிலமான வடக்கு கொர்டோபனில் உள்ள அரசாங்கக் கட்டுப்பாட்டு நகரங்கள் மீது துணை இராணுவப் படைகளான விரைவு ஆதரவுப் படைகள் (RSF) தங்களின் உயிரிழப்பை ஏற்படுத்தும் ட்ரோன் தாக்குதல்களைத் தீவிரப்படுத்தியுள்ளதாகப் பொதுமக்கள் தெரிவித்துள்ளனர்.
சர்வதேச அழுத்தங்கள் காரணமாக சில வாரங்களாக இந்தத் தாக்குதல்கள் குறைக்கப்பட்டிருந்த நிலையில், தற்போது மீண்டும் புதிய தாக்குதல் பிரச்சாரம் முன்னெடுக்கப்பட்டு வருவதாக பிரதேசவாசிகள் சுட்டிக்காட்டுகின்றனர்.
ட்ரோன் தாக்குதல்கள் குறித்து கருத்து தெரிவிக்க RSF மறுத்துள்ளபோதிலும், தாம் பொதுமக்களை இலக்கு வைப்பதில்லை எனக் குறிப்பிட்டுள்ளது.
சூடானில் மூன்று அரை வருடங்களுக்கும் மேலாக நீடிக்கும் உள்நாட்டுப் போரில், RSF மற்றும் அரசாங்க இராணுவம் ஆகிய இரு தரப்பினரும் ட்ரோன்களை முக்கிய ஆயுதமாகப் பயன்படுத்தி வருகின்றன.
நடப்பு ஆண்டின் முதற்பாதியில் இரு தரப்பும் நடத்திய ட்ரோன் தாக்குதல்களில் 1,000க்கும் மேற்பட்ட பொதுமக்கள் உயிரிழந்துள்ளதாக ஐக்கிய நாடுகள் சபை தெரிவித்துள்ளது.
கடந்த செப்டம்பர் 8ஆம் திகதி வடக்கு கொர்டோபனின் உம் ருவாபா (Um Ruwaba) நகரில் உள்ள மக்கள் நிறைந்த நீதிமன்றக் கட்டிடம் மீது நடத்தப்பட்ட ட்ரோன் தாக்குதலில் 10 பேர் உயிரிடைந்ததுடன், பலர் காயமடைந்தனர்.
அதற்கு அடுத்த நாள், மாநிலத் தலைநகரான அல்-ஒபெய்ட் (al-Obeid) நகரில் உள்ள கல்லூரி ஒன்றின் மீது நடத்தப்பட்ட தாக்குதலில் பாதுகாப்பு ஊழியர் ஒருவர் உயிரிழந்ததுடன், 8 வகுப்பறைகள் சேதமடைந்தன.
அல்-ஒபெய்ட் நகரில் பல மாதங்களாக RSF நடத்திய ட்ரோன் தாக்குதல்களால் அங்கிருந்து தப்பி உம் ருவாபா நகருக்கு தஞ்சமடைந்த நபர்களும் இந்தத் தாக்குதல்களில் காயமடைந்துள்ளனர்.
இஸ்ரேல், ஈரானிய மற்றும் துருக்கிய தயாரிப்பு ட்ரோன்கள் உள்ளிட்ட நவீன தொழில்நுட்பங்களை இரு தரப்பும் பயன்படுத்தி வரும் நிலையில், பொதுமக்கள் அன்றாட வாழ்க்கையில் தீவிர அச்ச உணர்வுடன் வாழ்ந்து வருவதாகத் தெரிவிக்கப்படுகிறது.
