யாழ்ப்பாண மாவட்டத்தில் நீரிழிவு நோயால் பாதிக்கப்பட்டவர்களின் எண்ணிக்கை அதிகரித்து வருவதாக யாழ்ப்பாணப் பல்கலைக்கழக மருத்துவ பீடாதிபதி பேராசிரியர் சுரேந்திரகுமரன் தெரிவித்துள்ளார்.
யாழ்ப்பாணத்தில் சுமார் ஆறு இலட்சம் மக்கள் வசிக்கும் நிலையில், அவர்களில் இரண்டு இலட்சம் பேர் வரையில் நீரிழிவு நோயால் பாதிக்கப்பட்டுள்ளதாக அவர் சுட்டிக்காட்டியுள்ளார்.
உலக நீரிழிவு தினத்தை முன்னிட்டு யாழ்ப்பாண மாவட்ட நீரிழிவு கழகத்தினால் ஏற்பாடு செய்யப்பட்ட விழிப்புணர்வு மருத்துவ முகாமில் கலந்துகொண்டு உரையாற்றும்போதே அவர் இதனைத் தெரிவித்தார்.
நீரிழிவு நோயைக் கட்டுப்படுத்த சீனி மற்றும் மாச்சத்து அதிகமுள்ள உணவுகளைக் குறைத்து, சீரான உணவுப் பழக்கத்தையும் தினசரி உடற்பயிற்சியையும் கடைப்பிடிக்க வேண்டும் எனவும் வலியுறுத்தினார்.
மேலும், பொதுமக்கள் உடற்பயிற்சியில் ஈடுபடுவதற்குத் தேவையான நடைபாதைகள், விளையாட்டு மைதானங்கள் மற்றும் ஏனைய வசதிகளை உள்ளூராட்சி மன்றங்கள் மேம்படுத்த வேண்டும் என்றும் அவர் கோரிக்கை விடுத்துள்ளார்.
