மட்டக்களப்பு நீதிமன்றத்தில் விவாகரத்து வழக்கு விசாரணைக்காகச் சென்ற கணவன், மனைவி மற்றும் மனைவியின் சகோதரர் ஆகியோருக்கிடையே ஏற்பட்ட மோதல் தொடர்பில் மூவர் பொலிஸாரால் கைது செய்யப்பட்டுள்ளனர்.
இந்தச் சம்பவம் இன்று புதன்கிழமை மட்டக்களப்பு காந்தி பூங்கா வாகனத் தரிப்பிடத்தில் இடம்பெற்றுள்ளது.
பார் வீதியைச் சேர்ந்த கணவன், மனைவிக்கிடையிலான குடும்பப் பிரச்சினை காரணமாக மனைவி விவாகரத்து வழக்குத் தாக்கல் செய்திருந்த நிலையில், வழக்கு விசாரணைக்காக இருவரும் தனித்தனியாக நீதிமன்றத்திற்கு வருகை தந்துள்ளனர்.
வழக்கு விசாரணை முடிந்து அடுத்த தவணை திகதியிடப்பட்ட பின்னர், மூவரும் நீதிமன்றத்திலிருந்து வெளியேறி காந்தி பூங்கா வாகனத் தரிப்பிடத்திற்குச் சென்றுள்ளனர்.
இதன்போது கணவனுக்கும் மனைவியின் சகோதரருக்கும் இடையே வாய்த்தர்க்கம் ஏற்பட்டு, அது கைகலப்பாக மாறியுள்ளது. அங்கிருந்த பொதுமக்கள் இருவரையும் விலக்கிவிட்டுள்ளனர்.
எனினும், பின்னர் கணவன் தனது காரை மைத்துனர் மீது செலுத்தி மோதியதாகவும், இதற்குப் பதிலடியாக மைத்துனர் காரைத் தாக்கியதில் வாகனம் பலத்த சேதமடைந்ததாகவும் பொலிஸாரின் ஆரம்பக்கட்ட விசாரணைகளில் தெரியவந்துள்ளது.
சம்பவ இடத்திற்குச் சென்ற மட்டக்களப்பு தலைமையகப் பொலிஸார், கணவன், மனைவி மற்றும் மைத்துனர் ஆகிய மூவரையும் கைது செய்துள்ளதுடன், காரையும் பொலிஸ் நிலையத்திற்குக் கொண்டு சென்றுள்ளனர்.
கைது செய்யப்பட்டவர்களை நீதிமன்றத்தில் ஆஜர்படுத்துவதற்கான நடவடிக்கைகள் முன்னெடுக்கப்பட்டுள்ளதுடன், சம்பவம் தொடர்பான மேலதிக விசாரணைகளை மட்டக்களப்பு தலைமையகப் பொலிஸார் மேற்கொண்டு வருகின்றனர்.











