கனடாவின் கனடியன் பிரீமியர் லீக் கால்பந்துப் போட்டியின் இறுதிப் போட்டியில், கால்கரி கேவலரி எஃப்.சி. அணியும் அட்லெடிகோ ஒட்டாவா அணியும் இன்று பலப்பரீட்சை நடத்துகின்றன.
கடந்த ஆண்டு இறுதிப் போட்டியில் பனிப்பொழிவுக்கு மத்தியில் கால்கரியை 2-1 என்ற கோல் கணக்கில் வீழ்த்தி சம்பியன் பட்டம் வென்ற ஒட்டாவா அணி, இம்முறையும் தனது பட்டத்தைத் தக்கவைத்துக்கொள்ளும் நோக்கில் களமிறங்குகிறது.
அதேவேளை, கடந்த ஆண்டுத் தோல்விக்குப் பதிலடி கொடுத்து இரண்டாவது முறையாகச் சம்பியன் பட்டத்தை வெல்லும் முனைப்பில் கால்கரி அணி உள்ளது.
குறிப்பாக, இந்தப் பருவத்தின் வழக்கமான போட்டிகளில் முதலிடத்தைப் பிடித்து CPL Shield விருதையும் வென்றுள்ள கால்கரி அணி, இன்று வெற்றிபெற்றால் ஒரே பருவத்தில் இரண்டு முக்கிய கிண்ணங்களையும் வென்ற முதல் அணியாக வரலாறு படைக்கும்.
மறுபுறம், ஒட்டாவா அணி தொடர்ச்சியாக இரண்டாவது ஆண்டும் North Star Cup சம்பியன் பட்டத்தை வெல்லும் வாய்ப்பைப் பெற்றுள்ளது.
இரு அணிகளும் அரையிறுதிப் போட்டிகளில் கடுமையான போட்டிகளுக்குப் பின்னரே இறுதிப்போட்டிக்குத் தகுதி பெற்றுள்ளன.
இறுதிப்போட்டி கால்கரியின் சொந்த மைதானமான ATCO Field-இல் இன்று பிற்பகல் 2 மணிக்கு ஆரம்பமாகிறது.
கால்கரியில் நிலவும் கடும் குளிரும் மைதானத்தின் நிலையும் போட்டியின் முடிவில் தாக்கத்தை ஏற்படுத்தக்கூடும் என எதிர்பார்க்கப்படுகிறது.
கடந்த ஆண்டு பனிப்பொழிவுக்கு மத்தியில் நடைபெற்ற இறுதிப்போட்டியைப் போலவே, இந்த ஆண்டும் இரு அணிகளுக்கும் இடையிலான மோதல் கால்பந்து ரசிகர்களின் கவனத்தை ஈர்த்துள்ளது.











