நாட்டில் வெள்ளிக்கிழமை (20) இடம்பெற்ற நான்கு வெவ்வேறு வீதி விபத்துக்களில் 79 வயதுடைய பெண் மற்றும் 23 வயதுடைய மோட்டார் சைக்கிள் செலுத்துநர் உள்ளிட்ட நால்வர் உயிரிழந்துள்ளதாகப் பொலிஸார் தெரிவித்துள்ளனர்.
மாலபே, கல்கிசை, ஏறாவூர் மற்றும் சம்மாந்துறை ஆகிய பிரதேசங்களிலேயே இந்த விபத்துக்கள் இடம்பெற்றுள்ளன.
கல்கிசை, காலி – கொழும்பு வீதியைக் கடக்க முற்பட்ட இரத்மலானை பிரதேசத்தைச் சேர்ந்த 79 வயதுடைய பெண் ஒருவர் கார் ஒன்றில் மோதியதில் பலத்த காயமடைந்துள்ளார். அவர் களுபோவில வைத்தியசாலையில் அனுமதிக்கப்பட்ட நிலையில் சிகிச்சை பலனின்றி உயிரிழந்துள்ளார். சம்பவம் தொடர்பில் காரின் சாரதி கைது செய்யப்பட்டுள்ளார்.
மட்டக்களப்பு – திருகோணமலை வீதியின் ஏறாவூர், காட்டுப்பள்ளி வீதிச் சந்திக்கு அருகில் இடம்பெற்ற விபத்தில் மணம்பிட்டிய பிரதேசத்தைச் சேர்ந்த 42 வயதுடைய மோட்டார் சைக்கிள் செலுத்துநர் ஒருவர் உயிரிழந்துள்ளார். வாழைச்சேனை நோக்கிப் பயணித்த லொறி ஒன்று முன்னால் சென்ற இரண்டு மோட்டார் சைக்கிள்களுடன் மோதிய பின்னர் கார் ஒன்றுடன் மோதியுள்ளது. இதில் காயமடைந்த இரு மோட்டார் சைக்கிள் செலுத்துநர்களும் ஏறாவூர் வைத்தியசாலையில் அனுமதிக்கப்பட்ட நிலையில் ஒருவர் உயிரிழந்துள்ளார். லொறியின் சாரதி கைது செய்யப்பட்டுள்ளார்.
சம்மாந்துறை, கல்முனை – அம்பாறை வீதியில் எதிர்த்திசையில் வந்த லொறியுடன் மோட்டார் சைக்கிள் ஒன்று மோதியதில் மல்வத்தை 02 பிரதேசத்தைச் சேர்ந்த 23 வயதுடைய மோட்டார் சைக்கிள் செலுத்துநர் உயிரிழந்துள்ளார். காயமடைந்த செலுத்துநரும் பின்னால் அமர்ந்து சென்றவரும் அம்பாறை வைத்தியசாலையில் அனுமதிக்கப்பட்ட நிலையில் செலுத்துநர் உயிரிழந்துள்ளார். லொறிச் சாரதி கைது செய்யப்பட்டுள்ளார்.
மாலபே, ஹொரஹேன சந்தியிலிருந்து ஹோகந்தர சந்தி நோக்கி வனகுரு மாவத்தையில் பயணித்த மோட்டார் சைக்கிள் ஒன்று பாதசாரி ஒருவர் மீது மோதியதில் அவர் உயிரிழந்துள்ளார். உயிரிழந்தவரின் அடையாளம் இதுவரை உறுதிப்படுத்தப்படவில்லை எனவும், நான்கு விபத்துக்கள் குறித்தும் அந்தந்தப் பொலிஸ் நிலையங்கள் மேலதிக விசாரணைகளை முன்னெடுத்து வருவதாகவும் பொலிஸார் தெரிவித்துள்ளனர்.











