நாட்டின் பொருளாதாரம் எதிர்பார்த்ததை விடவும் வலுவான வளர்ச்சியைப் பதிவுசெய்து, கடந்த ஜூலை மாதத்தில் 75,000 புதிய வேலைவாய்ப்புகளை உருவாக்கியுள்ளது.
இதன் மூலம் நாட்டின் வேலையின்மை வீதம் 6.4 சதவீதமாகக் குறைந்துள்ளது. கடந்த இரண்டு ஆண்டுகளில் இல்லாத மிகக் குறைந்த நிலையை, வேலையின்மை வீதம் எட்டியுள்ளதாக கனடாவின் புள்ளியியல் திணைக்களம் (Statistics Canada) இன்று வெளியிட்ட ஆய்வறிக்கையில் தெரிவித்துள்ளது.
நாட்டின் பொருளியலாளர்கள் ஜூலை மாதத்தில் சுமார் 15,000 முதல் 20,000 புதிய வேலைவாய்ப்புகளே உருவாக்கப்படும் என கணித்திருந்தனர்.
இந்த நிலையில், இந்த புதிய புள்ளிவிவரங்கள் சந்தை எதிர்பார்ப்புகளைத் தாண்டியுள்ளன. கனடாவின் தொழிலாளர் சந்தையில் ஏற்பட்டுள்ள இந்த முன்னேற்றம் குறித்துப் புள்ளியியல் திணைக்களம் முக்கிய விபரங்களை வெளியிட்டுள்ளது.
மாகாண ரீதியாக நோக்கும்போது, ஒன்ராறியோ (Ontario) மாகாணம் 52,000 புதிய வேலைவாய்ப்புகளுடன் முதலிடத்தில் உள்ளது. பிரிட்டிஷ் கொலம்பியா, மணிட்டோபா மற்றும் நோவா ஸ்கோஷியா ஆகிய மாகாணங்களிலும் வேலைவாய்ப்பு வீதம் அதிகரித்துள்ளமை குறிப்பிடத்தக்கது.
