செம்மணி புதைகுழி தொடர்பில் ஊகங்களின் அடிப்படையில் கருத்துகளை வெளியிட்டு, உண்மைகளை மூடி மறைக்கும் சூழலை உருவாக்கக் கூடாது என ஈழமக்கள் ஜனநாயகக் கட்சியின் ஊடகச் செயலாளர் ஸ்ரீகாந்த் பன்னீர்செல்வம் தெரிவித்துள்ளார்.
யாழ்ப்பாணம் ஊடக மையத்தில் இன்று புதன்கிழமை நடைபெற்ற ஊடகச் சந்திப்பில் கருத்துத் தெரிவித்த அவர், இந்த விவகாரத்தில் ஜனாதிபதி அநுரகுமார திசாநாயக்க நேரடியாகக் கவனம் செலுத்த வேண்டும் என்றும் வலியுறுத்தினார்.
செம்மணி புதைகுழி தொடர்பான இடைக்கால அறிக்கையில், மீட்கப்பட்ட எலும்பு எச்சங்கள் இயற்கைப் பேரிடர் அல்லது தொற்றுநோய் காரணமாக உயிரிழந்தவர்களுடையதாக இருக்கலாம் எனப் பேராசிரியர் ராஜ் சோமதேவா குறிப்பிட்டுள்ளமை தொடர்பில் கருத்துத் தெரிவித்த அவர், இத்தகைய சாத்தியக்கூறுகள் விஞ்ஞான ரீதியான ஆய்வுகள் மூலம் உறுதிப்படுத்தப்பட்ட பின்னரே வெளியிடப்பட வேண்டும் என்றார்.
மேலும், 1996ஆம் ஆண்டு காலப்பகுதியில் அந்தப் பகுதியில் 850க்கும் மேற்பட்டோர் காணாமல் போனதாகப் பதிவுகள் இருப்பதாகவும், அவர்களில் பலருக்கு என்ன நடந்தது என்பது இன்றுவரை தெரியாத நிலையில், உறவினர்கள் உண்மையை அறியக் காத்திருப்பதாகவும் அவர் குறிப்பிட்டார்.
எனவே, செம்மணி புதைகுழி தொடர்பான உண்மைகள் முறையான விசாரணைகள் மற்றும் விஞ்ஞான ஆய்வுகள் ஊடாக வெளிக்கொணரப்பட வேண்டும் என ஸ்ரீகாந்த் பன்னீர்செல்வம் வலியுறுத்தியுள்ளார்.
