வாழ்வின் இறுதி கட்டத்தில் உள்ளவர்கள், தங்களை தாங்களே காப்பாற்ற முடியாதவர்கள் மற்றும் தீவிர மருத்துவ சிகிச்சை பிரிவிலோ அல்லது வீட்டிலோ வைத்து பராமரிக்க முடியாத நிலையில் உள்ள நோயாளிகளுக்கு இறுதிவரை முறையான பராமரிப்பு வழங்குவதை நோக்கமாகக் கொண்டு புதிய நிலையம் ஒன்று திறக்கப்பட்டுள்ளது.
சாவகச்சேரி, சரசாலையில் புதிதாக அமைக்கப்பட்டுள்ள ‘கம்ஃபர்ட் கெயார் ஹோம்’ (Comfort Care Home) எனப் பெயரிடப்பட்டுள்ள வலிதணிப்புப் பராமரிப்பு இல்லத்தின் (Palliative Care Home) திறப்பு விழா நேற்று சனிக்கிழமை(24.10.2026) நடைபெற்றது.
அதனைத் தொடர்ந்து நடைபெற்ற ஊடகவியலாளர் சந்திப்பில் கருத்துத் தெரிவித்த யாழ்ப்பாணம் போதனா வைத்தியசாலைப் பணிப்பாளர் டொக்டர் த. சத்தியமூர்த்தி, இந்த நிலையத்தின் சேவையாக நோயாளிகளுக்கு இறுதிவரை கவனிப்பு வழங்குவதுடன், குறிப்பாக அவர்களுக்கு ஏற்படும் வலிகள் மற்றும் நோய்களைக் கட்டுப்படுத்துவதற்கான சேவைகள் வழங்கப்படும் எனத் தெரிவித்தார்.
மேலும், இது முற்றிலும் இலவசமான சேவையாகும் எனக் குறிப்பிட்ட அவர், இச்சேவையைப் பெற விரும்புபவர்கள் ஏதேனும் ஒரு வைத்தியசாலை ஊடாகவோ அல்லது மருத்துவர் ஒருவரின் சிபாரிசின் (Recommendation) பெயரிலோ சில தகவல்கள் மற்றும் விவரங்களை வழங்கிய பின்னர், முறையான அனுமதி பெற்று நோயாளிகளை இங்கு வைத்துப் பராமரிக்க முடியும் என விளக்கியுள்ளார்.
சுகாதார அமைச்சின் முழுமையான அனுசரணையோடு, எதிர்காலத்தில் இந்தச் சேவை மேலும் விரிவுபடுத்தப்படவுள்ளதால், ஏனைய நன்கொடையாளர்களும் தங்களது உதவிகளை வழங்கிப் பங்களிப்பு செய்ய முடியும் என்றும் அவர் மேலும் தெரிவித்துள்ளார்.
