யாழ்ப்பாண மாவட்டத்தின் தமிழர் பாரம்பரியத்தையும் கலை மரபுகளையும் பறைசாற்றும் வகையில், மாவட்ட பண்பாட்டுப் பெருவிழா நேற்று வெள்ளிக்கிழமை சிறப்பாக நடைபெற்றுள்ளது.
யாழ்ப்பாண மாவட்டச் செயலாளர் மருதலிங்கம் பிரதீபன் தலைமையில் நடைபெற்ற இந்த விழாவில், தமிழர் பாரம்பரியக் கலை நிகழ்வுகள், நூல் வெளியீடு, கலைஞர்களுக்கான கௌரவிப்பு மற்றும் மாவட்ட மட்டக் கலைப் போட்டிகளில் வெற்றிபெற்ற கலை மன்றங்களுக்கான விருது வழங்கும் நிகழ்வுகள் இடம்பெற்றன.
விழாவின் ஆரம்பமாக, யாழ்ப்பாண மாவட்டச் செயலக நுழைவாயிலிலிருந்து தமிழ்ப் பண்பாட்டு ஊர்வலம் ஆரம்பமானது. பல்வேறு பாரம்பரியக் கலை நிகழ்வுகளுடன் முன்னெடுக்கப்பட்ட இந்த ஊர்வலம், மாவட்டச் செயலக கேட்போர் கூடத்தைச் சென்றடைந்தது.
தொடர்ந்து, நாடகச் சக்கரவர்த்தி பரஞ்சோதி பரராஜசிங்கம் எனப்படும் பாப்பா அவர்களின் கலைப்பணிகளை நினைவுகூரும் வகையில் அமைக்கப்பட்ட அரங்கில் நிகழ்வுகள் நடைபெற்றன.
தமிழ்த் தாய் வாழ்த்து, வரவேற்பு நடனம், கோலாட்டம் மற்றும் காலிங்க நர்த்தனம் உள்ளிட்ட கலை நிகழ்வுகள் அரங்கேற்றப்பட்டன. இதனைத் தொடர்ந்து, பலாலி ஆசிரியர் கலாசாலையின் ஓய்வுநிலை அதிபரும், சாகித்திய ரத்னா விருது பெற்ற கவிஞருமான சோ. பத்மநாதன் அவர்கள் கௌரவிக்கப்பட்டார்.
இதன்போது, யாழ்ப்பாணத்தின் நாட்டார் வழக்காறுகளையும் சமூக அறிவியல் நோக்கிலான ஆய்வுகளையும் உள்ளடக்கிய “யாழ்ப்பாணம் – 05 நாட்டார் வழக்காறுகளும் சமூக அறிவியலும்” என்ற நூலும் வெளியிட்டு வைக்கப்பட்டது.
நூலின் உள்ளடக்கம் மற்றும் ஆய்வுப் பெறுமதிகள் தொடர்பான ஆய்வுரையை யாழ்ப்பாணப் பல்கலைக்கழகத்தின் முன்னாள் துணைவேந்தர் பேராசிரியர் என். சண்முகலிங்கம் நிகழ்த்தினார்.
இதனைத் தொடர்ந்து, பாரம்பரியக் கூத்திசைப் பாடல்கள், வீரம் குழுநடனம் மற்றும் கரகாட்டம் உள்ளிட்ட கலை நிகழ்வுகளும் இடம்பெற்றன.
மேலும், பிரதேச செயலக ரீதியாகத் தெரிவுசெய்யப்பட்ட மூத்த கலைஞர்களுக்கு “யாழ்முத்து” விருதும், இளம் கலைஞர்களுக்கு “இளங்கலைஞர்” விருதும் வழங்கிக் கௌரவிக்கப்பட்டது.
வடக்கு மாகாண பண்பாட்டலுவல்கள் திணைக்களத்தின் கீழ் பதிவுசெய்யப்பட்ட கலை மன்றங்களுக்கிடையில் நடைபெற்ற மாவட்ட மட்டப் போட்டிகளில் வெற்றிபெற்ற மன்றங்களுக்கும் சான்றிதழ்கள் வழங்கப்பட்டன.
கிராமியப் பாடல், இசை நாடகம், கும்மி நடனம், விழிப்புணர்வு வீதி நாடகம் மற்றும் கையெழுத்துச் சஞ்சிகை ஆகிய பிரிவுகளில் வெற்றிபெற்ற கலை மன்றங்கள் இதன்போது கௌரவிக்கப்பட்டன.
இந்த நிகழ்வில் பிரதம விருந்தினராக யாழ்ப்பாண மாவட்டத்தின் ஓய்வுநிலைச் செயலாளர் சுந்தரம் அருமைநாயகம் கலந்துகொண்டார்.
கடற்றொழில் அமைச்சர் இராமலிங்கம் சந்திரசேகர் சிறப்பு அழைப்பாளராகக் கலந்துகொண்டதுடன், யாழ்ப்பாணப் பல்கலைக்கழக கலைப்பீடாதிபதி பேராசிரியர் நாகமுத்து பிரதீபராஜா மற்றும் வடக்கு மாகாண பண்பாட்டலுவல்கள் அலகின் பிரதிப் பணிப்பாளர் தர்சினி நிதர்சன் ஆகியோர் சிறப்பு விருந்தினர்களாகவும் கலந்துகொண்டனர்.
அத்துடன், பலாலி ஆசிரியர் கலாசாலையின் ஓய்வுநிலை அதிபரும் சாகித்திய ரத்னா கவிஞருமான சோ. பத்மநாதன் மற்றும் யாழ்ப்பாண மாவட்ட ஓய்வுநிலை சிரேஷ்ட கலாசார உத்தியோகத்தர் சுகுணலினி விஜயரத்தினம் ஆகியோரும் கௌரவ விருந்தினர்களாகப் பங்கேற்றனர்.
தமிழர் பாரம்பரியக் கலைகளைப் பாதுகாத்தல், நாட்டார் வழக்காறுகளை ஆவணப்படுத்துதல் மற்றும் மூத்த, இளம் கலைஞர்களை ஊக்குவித்தல் ஆகியவற்றை முன்னிறுத்தி இந்தப் பண்பாட்டுப் பெருவிழா நடைபெற்றுள்ளது.
